Помощь  -  Правила  -  Контакты

Поиск:
Расширенный поиск
 

Размещено 16:01 8/04/2016


АКАФИСТ
Кондак 1
 
     Избраннаго благовестника спасения нашего, великаго слугу Божия и к Пречистей Деве Марии радостнаго посланника Гавриила Архангела восхваляем песньми и благохваленьми сими. Ты же, яко предстояй Престолу Царя Славы, от всяких нас бед и скорбных обстояний свобождай да с верою и любовию в похвалу тебе зовем:
     Радуйся, великий Архангеле Божий Гаврииле.
 
Икос 1
      Ангела предстателя, провозвестника Таин Божиих дивнаго, чуднаго Гавриила, Архистратига Сил безплотных восхвалим ныне, во умилении глубоцем припадающе и вопиюще:
     Радуйся, благовестниче чудный спасения нашего;
     Радуйся, Таин Божиих славный провозвестниче.
     Радуйся, Божиих велений исполнителю;
     Радуйся, спасения рода человеческаго усердный служителю.
     Радуйся, верным радость от Престола Вседержителя износящий;
     Радуйся, неверных на стезю правды и истины приводящий.
     Радуйся, великий Архангеле Божий Гаврииле.
 
Кондак 2
      Видяще тя, великий слуго Божественныя Премудрости, усерднейшаго ходатая и скоропредстательнейшаго помощника всем в нуждах и обстояниих сущим, радостно о тебе взываем Богу: Аллилуиа.
 
Икос 2
      Разума Божественнаго ты еси податель, Богомудре Гаврииле, ибо благодать сия дадеся ти от Предвечныя Премудрости Божия. Темже и нам, грешным, погрязшим в суете века сего, даждь от Божественныя Премудрости во ум и сердце наше свет истиннаго разума Божия, взывающим Ти сицевая:
     Радуйся, разума Божественнаго щедродательный подателю;
     Радуйся, первый книгописания рода человеческаго мудрый учителю.
     Радуйся, пророку Моисею премудрость Божественную открывый;
     Радуйся, сказавый ему миробытия начало.
     Радуйся, создание перваго человека Адама, и житие онаго, и по нем бывших возвестивший;
     Радуйся, и вся последующая лета и роды, о потопе и разделении языков, племен и народов сказавый.
     Радуйся, великий Архангеле Божий Гаврииле.
 
Кондак 3
      Силою Вышняго препоясанный и ею предивно укрепленный предстоиши Господу Твоему денно и нощно, немолчно взывая Ему песнь: Аллилуиа.
 
Икос 3
      Имать тебе, Архангеле Гаврииле, весь род христианский велика помощника, и благих советов подателя, и в недоумениях пребывающим дивнаго наставника, похваляющим Тя тако:
     Радуйся, пророку Даниилу истолковавый дивная видения о царех и царствах послежде быти имеющих, образованных различными зверьми;
     Радуйся, известивый ему о свобождении людей Божиих от Вавилонскаго пленения.
     Радуйся, ему же открывый о времени Христова в мир перваго пришествия;
     Радуйся, благовестивый ему о воплощении Сына Божия от Девы Марии.
     Радуйся, пророков премудрый вестниче;
     Радуйся, всех христиан ко благу учителю.
     Радуйся, великий Архангеле Божий Гаврииле.
 
Кондак 4
      Бурею сомнения, печали и уныния одержима бяше святая праведная Анна, егда скорбяше о неплодии и со слезами моляшеся в своем вертограде. Ты же, Божиим велением, явлься пред нею, возвестих ей глаголя: «Анно, Анно! Услышаны есть молитвы твоя, и воздыхания проидоша облаки, слезы же твоя пред Богом взыдоша, и се зачнеши, и родиши Дщерь Преблагословенную, о Нейже возблагословятся вся колена земная, и Тою дастся спасение миру, наречется же имя Ей Мария». Она же в велицей радости услышавши сие возопи: Аллилуиа.
 
Икос 4
      Слыша святый и праведный Иоаким, в сие время в пустыне постивыйся, от тебе, Архангеле Божий, яко имать со Анною праведною родити Дщерь предъизбранную от веков в Матерь Мессии, хотящаго приити на избавление рода человеческаго, во умилении глубоцем и радости возопи:
     «Радуйся, скорби моея пременителю;
     Радуйся, поношения моего в людех отъятелю.
     Радуйся, печали моея разрешителю;
     Радуйся, Божественныя воли о мне известителю».
     Радуйся, всему миру веселие неизреченное сим принесший;
     Радуйся, праведных Богоотец Иоакима и Анны сладостнейший утешителю.
     Радуйся, великий Архангеле Божий Гаврииле.
 
Кондак 5
      Боготечней звезде подобен еси, пречудне Гаврииле, сиянием своим мрак и тьму мира сего пречудно просвещаяй, и наставляяй на путь спасения всех, верою и усердием притекающих к тебе, и дерзновенно поющих Присносущному Солнцу Правды, Христу: Аллилуиа.
 
Икос 5
      Видяще тя, Архангеле Божий, провозвестника судеб Божиих и неложнаго исполнителя Его Святыя воли, рожденная от неплодове Богоотроковица Мария со вниманием и усердием послушаша святых твоих наказаний и с радостию велиею вопияше Ти:
     «Радуйся, родителей Моих несказанно явлением своим слезы, плач и непрестающую о безчадии скорбь утоливший;
     Радуйся, Ангеле мирный и добрый хранителю от Бога Ми данный.
     Радуйся, от первых дней Рождества Моего на охранение Ми ниспосланный»;
     Радуйся, Девы Богоотроковицы во дни детства Ея и юности охранителю.
     Радуйся, правыя веры и богопочитания насадителю;
     Радуйся, всем восхваляющим тя верный защитителю.
     Радуйся, великий Архангеле Божий Гаврииле.
 
Кондак 6
      Проповедника покаяния и преславнаго Предтечи Господня Иоанна рождество Ты, всемудре Гаврииле, возвещая родителю его Захарии священнику, не верующу твоему неложному пророчеству, языка немотою наказал еси до времени исполнения словес твоих, яже егда воочию увидевше пачеестественное сбытие его, возопи чудодействующему тобою Богу: Аллилуиа.
 
Икос 6
      Возсиял еси пречудно славою, Архангеле Гаврииле, егда предстал еси в Назарете граде, быв послан от Бога благовестити Богоотроковице Марии зачатие Сына Божия осенением и действием Духа Святаго, вопиюще Ей: «Радуйся, Благодатная, Господь с Тобою, Благословенна Ты в женах», и мы грешнии слышаще сию радость велию, тобою благовествуемую, взываем Ти сице:
     Радуйся, Адама и Еву, прародителей наших, сим благовестием неизреченно возрадовавый;
     Радуйся, всем праотцам и прародителям рода человеческаго сим провозглашением сбытие того вожделеннаго времене, на негоже они с твердым упованием надеяшася, возвестивый.
     Радуйся, вестию о явлении в мир долгожданнаго Искупителя рода человеческаго всех патриархов, пророков, ветхозаветных праведников и подвижников возвеселивый;
     Радуйся, воплощение Сына Божия мирови проповедавый.
     Радуйся, начало искупления рода человеческаго провозгласивый;
     Радуйся, главизну нашего спасения благовестивый.
     Радуйся, великий Архангеле Божий Гаврииле.
 
Кондак 7
      Хотящей Пресвятей Деве Марии разумети словеса благовестия Архангела Гавриила и видяще Себе в чистоте, глаголет ему дерзостно: «Преславнаго твоего гласа неудобоприятельно души Моей является, безсеменнаго бо зачатия Рождество како глаголеши, зовый: Аллилуиа».
 
Икос 7
      Новую сию и преславную весть о воплощении Сына Божия благовествуя Преблагословенней и Пречистей Деве Марии, ужасающейся и трепещущей, возопил еси, Архангеле: «Не бойся, Мариам, обрела бо еси благодать от Бога; и се зачнеши во чреве, и родиши Сына, и наречеши имя Ему Иисус. Сей будет велий и Сыном Вышняго наречется, и даст Ему Господь Бог Престол Давида отца Его, и воцарится в дому Иаковли во веки, и Царствию Его не будет конца». Сему обетованию и мы, грешнии, внемлюще и о величии и высоте его ужасающеся, взываем к Тебе:
     Радуйся, посланный во град Назарет проповедати начало и главизну нашего спасения;
     Радуйся, благовестивый всемирную радость Благовещения.
     Радуйся, небожителю светообразный;
     Радуйся, ликов Ангельских сияние и свете пречудный.
     Радуйся, в раи Божия неизреченныя красоты и доброты ближайший зрителю;
     Радуйся, Престола Пресвятыя Троицы умиленнейший предстоятелю.
     Радуйся, великий Архангеле Божий Гаврииле.
 
Кондак 8
      Странное и пречудное возвещение о рождении Искупителя рода человеческаго от Архангела Гавриила слышаще, Пресвятая Дева рече ему: «Како будет сие, идеже мужа не знаю», и отвещав он, рече Ей: «Дух Святый найдет на Тя, и Сила Вышняго осенит Тя; темже и Раждаемое Свято наречется Сын Божий». Словеса Твои, конечне утвердиша Деву Пресвятую, Иже и рече Ти: «Се Раба Господня, буди по глаголу Твоему, вопиющей: Аллилуиа».
 
Икос 8
      Весь еси в вышних, Гаврииле, Престолу Царя Славы предстояй, не далек еси и от нижних, памятуя и послушая всех взывающих Ти сице:
     Радуйся, предвечных судеб Троических возвестителю;
     Радуйся, посланниче Божий и чудес Его предобрый служителю.
     Радуйся, о роде человечестем усердный предстателю;
     Радуйся, христиан православных защитителю.
     Радуйся, Егоже вси вернии восхваляют;
     Радуйся, о Немже вси православнии ликовствуют.
     Радуйся, великий Архангеле Божий Гаврииле.
 
Кондак 9
      Вси пастыри Вифлеемстии удивишася зело, слышаще благовестие Твое, пречудный Архангеле Гаврииле, о рождении Христа Спасителя; и пречудному пению Твоему и с Тобою прочим воям Небесным сладостно поющим: «Слава в вышних Богу и на земли мир, в человецех благоволение», внемлюще, возопиша Богу: Аллилуиа.
 
Икос 9
      Витии многовещанныя много труждаются в восхвалении Тя, Божественный Гаврииле, и Твоих благодеяний, яже всегда твориши в мире сем, мы же, аще и вемы немощь нашу, по достоянию восхваляти Тя дерзаем, вопиюще ти сице:
     Радуйся, пастырей Вифлеемских обрадовавый;
     Радуйся, извещением о Родившемся Спасителе мира несказанно их возвеселивый.
     Радуйся, со множеством Ангелов в ту нощь Родившагося Сына Божия воспевший;
     Радуйся, кротким и смиренным пастырем первым от всех человек Рождение Христа возвестивый.
     Радуйся, смиренных, кротких и невысокомудрствующих рабов Божиих любящий;
     Радуйся, всегда готовый их послушати.
     Радуйся, великий Архангеле Божий Гаврииле.
 
Кондак 10
      Спасти хотя мир и искупити его от греха, проклятия и смерти, Господь наш Иисус Христос в нощь, в нюже предаяшеся, пребывая на молитве в вертограде Гефсиманстем и молящеся до пота кровава, от тебе, Гаврииле, укрепляшеся в подвизе сем, ибо ты еси воистинну крепость Божия, и укрепляеши в подвизех христианских всех вопиющих: Аллилуиа.
 
Икос 10
      Стена еси, Гаврииле пречудне, святым женам Мироносицам, егда они свитающе во едину от суббот пришедше на гроб, носящи мира и яже уготоваша, и, не обретше телесе Господа Иисуса, быша во ужасе и скорби велицей о Возлюбленнем Учителе их. И се Ты рекл еси женам: «Не бойтеся вы, вем бо, яко Иисуса Распятаго ищите. Несть зде, восста бо, якоже рече: приидите, видите место, идеже лежа Господь», они же обрадовани бывше словесем Твоим, Архангеле, возопиша Ти тако:
     Радуйся, светлыя и радостныя вести о Воскресении Христове первый благовестителю;
     Радуйся, о победе Христовой над смертию и адом сладкогласнейший возвестителю.
     Радуйся, снизшедый в трусе велием с Небесе, к Живоносному Гробу;
     Радуйся, отваливый камень гробный запечатанный.
     Радуйся, зраком Твоим молниеобразным стрегущих устрашивый;
     Радуйся, Создателю твоему и Владыце Господу, самовластно и пречудно Воскресшему, послуживый.
     Радуйся, великий Архангеле Божий Гаврииле.
 
Кондак 11
      Пение хвалебное приносим Ти, Архангеле Божий Гаврииле. Ты же, яко скоропредстательный наш защитник и ко всякому благу наставник, покрый нас кровом крил твоих, отжени от нас, грешных, духов злобы поднебесных и сохрани от наветов и клеветы злых человек, всех вопиющих о тебе Богу: Аллилуиа.
 
Икос 11
      Светоносный служитель и благодатный вестниче воли Божественной, премудрый Гаврииле, послан был еси паки ко Пречистей Деве Марии рещи Ей о премирном восшествии, сиречь приблизившемся Ея славном Успении, нося ей райское вравие. Она же радостное его возвещение приемши о преселении в горнее Царствие, вопияше Ти тако:
     «Радуйся, принесший Ми с Неба целование;
     Радуйся, послуживший Ми при Таинстве Боговочеловечения.
     Радуйся, паки Ми посланный приуготовитися ко исходу от жизни сея;
     Радуйся, возвестителю Божественный о Мне воли Сына Моего и Бога».
     Радуйся, честнаго и славнаго Успения Богоматере служителю;
     Радуйся, принесший Ей с Небесе радостнаго рая вравие.
     Радуйся, великий Архангеле Божий Гаврииле.
 
Кондак 12
      Благодать от Бога с Небесе испроси нам, поющим во славу всечестнаго имене Твоего, Гаврииле, да осеняеми Твоим заступлением, во всяком благочестии и чистоте поживем дондеже, отрешени смертию от уз плоти, сподобимся предстати огнезрачному Престолу Царя Славы и с лики Ангельскими возопити: Аллилуиа.
 
Икос 12
      Поюще твой всечестный собор, восхваляем Тя, премудрый Архангеле Божий Гаврииле, и молим Господа и Владыку всяческих Твоим предстательством мир миру даровати, Церковь Его Святую утвердити и непоколебиму до скончания века соблюсти, православных же христиан в вере укрепити, поющих Ти таковая:
     Радуйся, многажды в Ветхом Завете спасению человеческому послуживый;
     Радуйся, в Новом Завете многократно сему же спасению человеческому потрудивыйся.
     Радуйся, добрый нам путеводителю в Горнее Царство;
     Радуйся, усерднейший ходатаю нашего спасения.
     Радуйся, рода христианскаго великий благодетелю;
     Радуйся, страны нашея православныя покровителю.
     Радуйся, великий Архангеле Божий Гаврииле.
 
Кондак 13
      О, предивный и преславный Архангеле Божий Гаврииле, превечных судеб Божиих возвестителю и усерднейший наш помощниче! Услыши нас приносящих Ти сия малыя молитвы и, яко милостив сый, умоли Царя Славы избавитися нам от всех бед, напастей и печали во временней сей жизни; и в будущей, вечней, исходатайствуй шуияго стояния и вечных мук избежати, и сподобитися нам во Царствии Небеснем пети непрестанно с лики Ангельскими: Аллилуиа.

Этот кондак читается трижды, затем икос 1-й и кондак 1-й

Молитва

      О, пречудный Архангеле Божий Гаврииле, усерднейший молитвенниче о душах наших, смиренно молим тя, заступника нашего: испроси святыми твоими всемощными молитвами пред Престолом Божиим всегда возносимыми, святый храм сей до конца мира сего сохранити, веру Христову утвердити, укрепити и расширити, православным христианом святоотеческую православную веру до конца дней наших непорочно сохранити, во всех заповедех Господних неуклонно ходити, покаяние истинное о гресех наших всегда Богу приносити, и сподобитися мирныя христианския кончины и добраго ответа на Страшнем Суде Божием. Умоли нам Царствие Небесное наследовати и вкупе с тобою прославити Пречестное и Великолепое имя Пресвятыя Троицы, Отца и Сына и Святаго Духа, ныне и присно и во веки веков. Аминь.
 
Размещено 16:07 8/04/2016


Др. Вариант АКАФИСТА

Кондак 1      
Избраннаго Архангела, присно предстоятеля престолу Вседержителя, таинника благодати, и радости благовестника, всечестнаго Гавриила, Пречистыя Девы невестокрасителя, пением похвальным благочестно почтим, со благодарением ему зовуще:
     Радуйся, Архангеле Гаврииле, вечнаго спасения нашего благовестниче.
 
Икос 1
      Ангел безплотный естеством бысть, славы присносущныя и вечныя Премудрости в создании мира зритель явился еси, Архангеле. Сего ради тебе вопием:
     Радуйся, именем твоим силу Божию возвещаяй;
     Pадуйся, дивное красотою Твоею неизреченную славу Божию являяй.
     Радуйся, душе невещественный, свободный от уз телесного естества;
     Pадуйся, светлый уме, подобие невидимаго Божества.
     Радуйся, Божественнаго разума вместилище;
     Pадуйся, неизреченных тайн сокровище.
     Радуйся, первосияннаго света чистейший луче;
     Pадуйся, пламенем Божественныя любви горящая свеща.
     Радуйся, престола Божия предстателю;
     Pадуйся, славы Господней созерцателю.
     Радуйся, нас земнородных утешение;
     Радуйся, Архангеле Гаврииле, вечнаго спасения нашего благовестниче.
 
Кондак 2
      Видяще тя, яко звезду лучезарную, благоукрашеннаго небесе разумнаго, созданнаго прежде видимого небесе и земли, Архангеле, да вопием с тобою Творцу Богу: Аллилуиа.
 
Икос 2
      Разум творческий созерцая в творении небесе и земли, и всего украшения их, благоговейно предстоял еси, Архангеле, престолу Создателя: егда же сотворены быша звезды, велиим гласом восхвалил еси Того со всеми Небесными силами. Тем же и мы Тебе вопием:
     Радуйся, небо невещественное, славу Божию поведающее;
     Pадуйся, светило духовное, благость Творца возвещающее.
     Радуйся, звездо, прежде видимого света возсиявшая;
     Pадуйся, пресветлая луно, обилие благодати, паче иных многих Ангел восприимшая.
     Радуйся, зерцало Божественнаго откровения;
     Pадуйся, споспешнице духовнаго просвещения.
     Радуйся, Первоангеле нижних чинов ангельских, тайны Божия открываяй;
     Pадуйся, Света вторый, поющие Ти верныя просвещаяй.
     Радуйся, чистейшая пламенная к Богу любве;
     Pадуйся, немолчныя уста Того хваления.
     Радуйся, огнем благодати сердечныя нас согревающая;
     Pадуйся, зной страстей тем отражаяй.
     Радуйся, Архангеле Гаврииле, вечнаго спасения нашего благовестниче.
 
Кондак 3
      Силе Божией тезоименит сый, споборник явился еси, Архангеле пресветлаго Небеснаго воинства, Архистратигу Михаилу противу падших мрачных духов. Пребыв же верен Господу Создателю с прочими безплотными чинами, взывал еси Тому Трисвятую песнь. Ему же и мы с тобою вопием: Аллилуиа.
 
Икос 3
      Имея благодать неотъемлему ради верности твоей Господу, во веки пребываеши утверждаем во благом изволении. Тем же в похвалу вопием Тебе сице:
     Радуйся, не изменивый твоего благодатнаго стояния;
     Pадуйся, не оставивый блаженнаго горнего пребывания.
     Радуйся, предстоятелю безплотных, веления Божия исполняяй;
     Pадуйся, предивным смирением украшенный.
     Радуйся, Божиею благодатию навеки утвержденный;
     Pадуйся, огненною, никогда не отпадающею любовию ко Господу пылаяй.
     Радуйся, небесного хлеба Ангельскаго присно вкушаяй;
     Pадуйся, небесных учителю, хвалебных создателю песней.
     Радуйся, вышних руководителю, возводяй нас к Славе небесней;
     Pадуйся, чиноначальниче немолчнаго Ангельскаго ликостояния.
     Радуйся, увеселение и услаждение имущим сего блаженнаго достояния;
     Радуйся, Архангеле Гаврииле, вечнаго спасения нашего благовестниче.
 
Кондак 4
      Бурю помышлений сумнительных светом Божественныя благодати прогоняяй, приносиши свыше, Архангеле, мир в сердца наша. Тем же благодарно, прославляюще благодеяния твоя, воспеваем Спасителю Богу песнь: Аллилуиа.
 
Икос 4
      Слышаще Боговдохновенныя сказания пророка Моисея о начале миробытия и повести о первых родех, учителя того благочестно разумеем тя, Архангеле, яко повелением Божиим недоуведанныя тайны тому открыл еси. Сего ради в похвалу тебе вопием:
     Радуйся, светозарная звездо, облиставаемая от трисолнечнаго Божества;
     Pадуйся, славнаго изобилием благодати украшение созданнаго естества.
     Радуйся, служебный душе на спасение человеком от Бога посылаемый;
     Pадуйся, светильниче Божиих откровений, на земли являемый.
     Радуйся, пламень огненный, плевелы лжи и суеверия попаляяй;
     Pадуйся, мечу духовный, терние неверия и безбожия словом истины посекаяй.
     Радуйся, истиннаго разумения словесе Божия небесный учителю;
     Pадуйся, величия тайны спасения предопределенный служителю.
     Радуйся, таиниче под именем первозданного небесе, невидимый мир Ангельский прикровенно чрез бытописание нам указуяй;
     Pадуйся, в творческом слове Божием всемогущее ипостасное Слово Божие нам показуяй.
     Радуйся, в создании человека, и в нарочитых Божественных словесех, действиях и в ветхозаветных образах, тайну Пресвятыя Троицы нам являяй;
     Pадуйся, в Божиих обетованиях древним патриархом начало нашего спасения возвещаяй.
     Радуйся, Архангеле Гаврииле, вечнаго спасения нашего благовестниче.
 
Кондак 5
      Боготечная струя откровений Божественных явился еси, Архангеле, и в последнем пророческом роде, ясно назнаменуя пророку Даниилу о последних временах, царех и царствиях. О сем вопием дивному в судьбах Своих Царю царей Богу хвалебную песнь: Аллилуиа.
 
Икос 5
      Видяще исполнение ясных пророчеств Твоих, Архангеле, о будущем освобождении ветхозаветнаго Израиля от плена Вавилонскаго, и о явлении по сих в мире Христа Владыки. Мы, же, яко Богоизбранный Израиль благоговейно благодаряще Свободителя душ наших похвальную песнь Тебе приносим:
     Радуйся, Божественнаго света селение;
     Pадуйся, наших мыслей озарение.
     Радуйся, будущих судеб Божиих яснозрителю;
     Pадуйся, испытующих свидения Господня тайноучителю.
     Радуйся, вождем благочестивым на враги одоление подаваяй;
     Pадуйся, мудрым правителем Божественное откровение являяй.
     Радуйся, конечное посрамление языческаго нечестия в радости возвестивый;
     Pадуйся, муже желаний, духовных грядущих, свобождением Израиля возвеселивый.
     Радуйся, возрождение Иерусалима, и возсоздание святаго храма предуказавый;
     Pадуйся, пришествие Христа Мессии ясно назнаменовавый.
     Радуйся, седминами исчисливый время спасительныя смерти Христа;
     Pадуйся, откровением Твоим ветхозаветному сыновнему богослужению конец наста.
     Радуйся, Архангеле Гаврииле, вечнаго спасения нашего благовестниче.
 
Кондак 6
      Проповедник всемирный радостныя вести о Спасителе был еси, Архангеле, егда бо приблизися седминами святому пророку Даниилу возвещенное время явление Христа Мессии, послан бысть еси к сетующим о неплодстве своем родителем Богоматери, возвестити им о рождении Благословенныя Дщери, предъизбранней от веков Матери Мессии Христа, хотящаго приити на избавление человечества, Ему же с тобою вопием: Аллилуиа.
 
Икос 6
      Возсия тобою, Архангеле, сетующим родителем Богоотроковицы утешение о скором разрешении неплодства их, рождением Преблагословенныя. Прием от них убо велие благодарение, приими и от нас сицевую похвалу:
     Радуйся, светлое зерцало Божия благости;
     Pадуйся, небесный вестниче спасительныя радости.
     Радуйся, Божественный вестниче, носителю вышняго мира благословения;
     Pадуйся, скорый прогонителю душевнаго смущения.
     Радуйся, блуждающим во тьме, Боговедения внезапное озарение;
     Pадуйся, сидящим в смертной сени уныния, благодатное оживление.
     Радуйся, обрадователю смиренных и уничиженных;
     Pадуйся, утешителю презренных и отверженных.
     Радуйся, смертоносныя печали мира сего прогонителю;
     Pадуйся, спасительныя по Бозе печали возбудителю.
     Радуйся, от находящия скорби избавляяй;
     Pадуйся, уповающия на Господа возвеселяяй.
     Радуйся, Архангеле Гаврииле, вечнаго спасения нашего благовестниче.
 
Кондак 7
      Хотяще ясне озарити путь веры восходящему Солнцу Правды, Христу Спасителю, Господь посла тя, Архангеле, благовестити такожде и иерею Захарии о рождении от него великого Иоанна, Предтечи Спасова. О сем убо радующеся вопием Богу: Аллилуиа.
 
Икос 7
      Дивному пророческому словеси твоему о рождении Предтечи неверие показавый того родитель немотою связан бысть от тебе, Архангеле. Мы же исполнение пророчества видяще, похвалу тебе сице вопием:
     Радуйся, звездо светозарная, разгоняющая мрак прошедшия ночи смертныя;
     Pадуйся, деннице, вещаюшая невечерний день благодати новыя.
     Радуйся, зачало Евангелия иерею Захарии предвозвестивый;
     Pадуйся, прославляти Господа разрешением языка последнего научивый.
     Радуйся, пути ко Грядущему Спасителю небесныя уготовителю;
     Pадуйся, семена спасительныя веры в Того на земли насадителю.
     Радуйся, Божественнаго всемогущества ревностный показателю;
     Pадуйся, всякаго сомнения в том строгий наказателю.
     Радуйся, Церкви ветхозаветныя невестоводителю;
     Pадуйся, Грядущаго Жениха Христа благовестителю.
     Радуйся, завершителю пророческаго в Ветхом Завете откровения;
     Pадуйся, первый возвестителю Евангельскаго в Новом Завете исполнения.
     Радуйся, Архангеле Гаврииле, вечнаго спасения нашего благовестниче.
 
Кондак 8
      К Богоотроковице Марии, чудесно рожденной от неплодове, хранителем от Бога приставлен был еси, великий Архангеле, и во храме Божием Сию духовно и телесно питал еси, на всяк день пищу принося Ей и поучая непрестанно пети Богу: Аллилуиа.
 
Икос 8
      Весь мир небесный и земный дивится служению Твоему, Архангеле, в месяц бо шестый по зачатию великаго Предтечи Христова Иоанна, послан был еси в Назарет с таинством от века сокровенным и самим Ангелом неведомым, благовестити Пречистей Деве Марии Богородице, непостижимое Сына Божия в Ней зачатие. Тем же в похвалу Тебе, яко благовестнику нашего спасения радостно вопием:
     Радуйся, совета предвечного откровение;
     Pадуйся, таинств сокровенных явление.
     Радуйся, светоносный спасительный день, благовестившая много светлая заря;
     Pадуйся, первый луче восходящего Солнца Правды, Христа Царя.
     Радуйся, Божественныя славы Сына Всевышнего возвестителю;
     Pадуйся, сладчайшего имени Иисуса первый возгласителю.
     Радуйся, благовестниче вечнаго Царства Христова;
     Pадуйся, спасительный утешителю человеческаго рода грешнаго.
     Радуйся, Божественныя нашей веры наставниче;
     Pадуйся, усердный наш ко Господу Спасителю, молитвенниче.
     Радуйся, хотящим последовати спасения вышний служителю;
     Pадуйся, всего рода христианскаго небесный покровителю.
     Радуйся, Архангеле Гаврииле, вечнаго спасения нашего благовестниче.
 
Кондак 9
      Все богатство смирения и непорочности явила еси, Приснодева, егда смутися о преславнем Архангельстем приветствии и недоумеющи вопросила благовестника: «Како будет сие, идеже мужа не знаю?» Ты же, утверждая Ю, рекл еси: «Дух Святый найдет на Тя, и сила Вышняго осенит Тя; темже и раждаемое свято наречется Сын Божий». Тому убо поклоняющеся с тобою вопием: Аллилуиа.
 
Икос 9
      Витии многовещании не довлеют к похвале дивного служения твоего, Архангеле. Мы же любовию побеждаеми, паки тебе яко благовестнику нашего спасения вопием:
     Радуйся, небесный уме Божественных откровений, светлое зерцало;
     Pадуйся, отъемляй с духовных очес наших ветхаго закона покрывало.
     Радуйся, Всевышняго Цари превышний служителю;
     Pадуйся, тайны Триестественнаго Божества твердый изъяснителю.
     Радуйся, истинное вочеловечение Сына Божия провозглашаяй;
     Pадуйся, безмужнее Того зачатие от Приснодевы нашествием Святаго Духа возвещаяй.
     Радуйся, Божественную силу Утешителя извествуяй;
     Pадуйся, благодатное тем осенение Пречистыя Девы благовествуяй.
     Радуйся, кимвале, веления Божия возглашаяй;
     Pадуйся, органе, Божественное смотрение прославляяй.
     Радуйся, псалтире, Божественное снисхождение Сына Божия возвещаяй;
     Pадуйся, прекрасная гусль Святаго Духа, утешение воспевающий.
     Радуйся, Архангеле Гаврииле, вечнаго спасения нашего благовестниче.
 
Кондак 10
      Спасти хотя в бури недоумения суще праведного Иосифа, обручника Пречистыя Отроковицы, явился еси тому, Архангеле, уверяя его о Неискусобрачней, яко зачатие у Ней от Духа Святаго есть, и по сих Христу рождшемуся в Вифлееме благовестил еси сию радость велию пастырем, и со множеством вои Небесных воспел еси: слава в вышних Богу! Ему же и мы присно вопием: Аллилуиа.
 
Икос 10
      Царю Христу прежде вольнаго страдания, молившемуся в вертограде, явился еси, Архангеле, укрепляя Его, яко человека в подвиге суще. Тем же и нас немощных духом, божественною благодатию укрепи, да радостно в похвалу Тебе вопием:
     Радуйся, скорый предстателю в бедех сущих;
     Pадуйся, усердный заступниче, упование на тя имущих.
     Радуйся, во искушениих сильный помощниче;
     Pадуйся, противу злых духов крепкий поборниче.
     Радуйся, мрак недоумений и смущений от сердец наших прогоняяй;
     Pадуйся, познанием воли Божией разум наш озаряяй.
     Радуйся, в печали сущия утешаяй;
     Pадуйся, елеом милости Божией сердца скорбных умащаяй.
     Радуйся, истиннаго боговедения ищущих, небесный учителю;
     Pадуйся, жизни благочестивыя не ложный известителю.
     Радуйся, к равноапостольскому житию непрестанный возбудителю;
     Pадуйся, в горнее Царство благонадежный водителю.
     Радуйся, Архангеле Гаврииле, вечнаго спасания нашего благовестниче.
 
Кондак 11
      Пение хвалебное воспевал на небеси с прочими Небесными силами Воскресению Христову, и на земли возвеститель того был еси, Архангеле, явився мироносицам при гробе и благовестив тем возстание Христа Живодавца, Его же с тобою прославляюще, вопием: Аллилуиа.
 
Икос 11
      Светоподательный светильник откровения Божия, Пречистей Деве Богородице явился еси, Архангеле, и тепле молившейся на горе Елеонстей благовестил еси Ей, яко приближися честное Ея Успение, и райскую светоносную ветвь подал еси Ей. Сего ради приими от нас сию хвалебную песнь:
     Радуйся, славнейший от седми духов, предстоящих престолу Вседержителя;
     Pадуйся, честнейший на земли слуго Пречистыя Матери Христа Спасителя.
     Радуйся, спасительных откровений Божиих изрядный служителю;
     Pадуйся, любве милосердия Божия присный благовестителю.
     Радуйся, теплыя молитвы к Богу верных на Жертвенник Небесный возносяй;
     Pадуйся, мир и благословение Божие оттуду им приносяй.
     Радуйся, усердный помощниче в добродетельной жизни подвизающихся;
     Pадуйся, благий утешителю ко блаженней кончине приближающихся.
     Радуйся, пред престолом Небесным Судию праведнаго о нас умоляяй;
     Pадуйся, яко с верою к тебе молящияся от вечных мук избавляются.
     Радуйся, яко любовь к тебе имущии вечнаго Царствия со Ангелы сподобляются.
     Радуйся, Архангеле Гаврииле, вечнаго спасения нашего благовестниче.
 
Кондак 12
      Благодатныя знамения Твоея помощи не токмо в древния, но и в новыя времена являеши, Архангеле, пречестная бо обитель Дохиарская на святей горе Афонстей, создавши храм во имя Архангелов, доныне возвещает чудо Твое, егда купно со Архистратигом Михаилом спасл еси благочестиваго послушника от горькия смерти в пучине морстей, и благодарне вопием Богу: Аллилуиа.
 
Икос 12
      Воспевая на небеси с прочими безплотными Честнейшую Херувим, тому же и нас сущих на земли научаеши. Всечестнейшая бо другая афонская обитель, именуемая «Достойно есть», именем своим проповедует другое преславное чудо явления твоего, Архангеле, благоговейному послушнику, его же научил еси небесней песни ко прославлению Богоматере. Сию бо поюще в честь Богородицы и тебе достойно в похвалу вопием:
     Радуйся, небесный обрадователю Матери Преблагословенныя;
     Pадуйся, невестокрасителю Приснодевы Нетленныя.
     Радуйся, небесный Ея воспевателю;
     Pадуйся, в вечней славе Тоя предстоятелю.
     Радуйся, яко и прочия чины Ангельские возбуждаеши воспевати Честнейшую Херувим;
     Pадуйся, яко нас земнородных научаеши прославити Славнейшую Серафим.
     Радуйся, ревнующим об ангельстем житии вышний покровителю;
     Pадуйся, в молитве к Богу предобрый учителю.
     Радуйся, сердца молящихся любовию ко Господу возжигаяй;
     Pадуйся, фимиам чистых молитв на алтарь Небесный возлагаяй.
     Радуйся, благодетию умиления молящихся услаждаяй;
     Pадуйся, в безмолвии их тою утешаяй.
     Радуйся, Архангеле Гаврииле, вечнаго спасения нашего благовестниче.
 
Кондак 13
      О великий Архангеле Гаврииле, сокровеннейших тайн Божиих служителю, воплощение Сына Божия прерадостный благовестниче, и нашего спасения усердный споспешниче. Приими от нас недостойных сие хвалебное и благодарственное пение, и умоли Господа даровати нам наследие в вечном Его Царствии, да с тобою непрестанно воспоем Ему: Аллилуиа, Аллилуиа, Аллилуиа.

Этот кондак читается трижды, затем икос 1-й и кондак 1-й

Молитва Архангелу Гавриилу

      О, пречудный Архангеле Божий Гаврииле, усерднейший молитвенниче о душах наших, смиренно молим тя, заступника нашего: испроси святыми твоими всемощными молитвами пред Престолом Божиим всегда возносимыми, святый храм сей до конца мира сего сохранити, веру Христову утвердити, укрепити и расширити, православным христианом святоотеческую православную веру до конца дней наших непорочно сохранити, во всех заповедех Господних неуклонно ходити, покаяние истинное о гресех наших всегда Богу приносити, и сподобитися мирныя христианския кончины и добраго ответа на Страшнем Суде Божием. Умоли нам Царствие Небесное наследовати и вкупе с тобою прославити Пречестное и Великолепое имя Пресвятыя Троицы, Отца и Сына и Святаго Духа, ныне и присно и во веки веков. Аминь.
 
 
Требуется материальная помощь
овдовевшей матушке и 6 детям.

 Помощь Свято-Троицкому храму